پاسداران انقلاب نے آبنائے ہرمز کھلنے سے متعلق امریکی دعویٰ مسترد کر دیا

ایران کی سپاہ پاسدارانِ انقلاب نے آبنائے ہرمز کے مکمل طور پر کھلنے سے متعلق امریکی دعوے کو سراسر مسترد کر دیا ہے۔ پاسدارانِ انقلاب نے اپنے ایک جاری کردہ بیان میں کہا کہ ایرانی بحریہ کا آبنائے ہرمز پر مکمل کنٹرول قائم ہے اور امریکی انتظامیہ کا یہ دعویٰ دراصل اپنی ناکامیوں کو چھپانے کی ایک ناکام کوشش ہے۔ ایرانی سپاہ نے واضح کیا کہ جب تک ایران کے خلاف امریکی کارروائیوں کا مکمل خاتمہ نہیں ہو جاتا، تب تک آبنائے ہرمز پر عائد پابندیاں برقرار رہیں گی۔ واضح رہے کہ اس سے قبل امریکی وزیرِ خزانہ نے دعویٰ کیا تھا کہ گزشتہ دو ہفتوں کے دوران 130 ملین بیرل تیل آبنائے ہرمز کے ذریعے منتقل کیا جا چکا ہے۔