مائیکروسافٹ کی سروسز دنیا بھر میں متاثر، صارفین کو شدید مشکلات

دنیا بھر میں مائیکروسافٹ کی مختلف آن لائن سروسز میں اچانک فنی خرابی اور تعطل کے باعث لاکھوں صارفین کو شدید مشکلات کا سامنا کرنا پڑا، جن میں مائیکروسافٹ ٹیمز، آؤٹ لک اور مصنوعی ذہانت کا سافٹ ویئر کوپائلٹ نمایاں طور پر متاثر ہوئے۔ مائیکروسافٹ نے جمعرات کو سروسز میں تعطل کی تصدیق کرتے ہوئے وضاحت کی کہ یہ مسئلہ صارفین کی ٹریفک بڑھنے کے باعث نہیں بلکہ متعدد سرورز کے اچانک دستیاب نہ ہونے کی وجہ سے پیدا ہوا، جس سے انفراسٹرکچر کے باقی حصوں پر غیر معمولی دباؤ بڑھ گیا۔ سروسز کی نگرانی کرنے والی ویب سائٹ “ڈاؤن ڈیٹیکٹر” کے مطابق امریکا اور برطانیہ میں صارفین کی بڑی تعداد نے شکایات درج کرائیں اور صرف امریکا میں آؤٹ لک کے حوالے سے ایک لاکھ 31 ہزار سے زائد شکایات موصول ہوئیں، جبکہ مائیکروسافٹ کا کہنا ہے کہ کنکشن کے مسائل اور سرورز کی خودکار جانچ کے دوران پیدا ہونے والی خرابی دور کرنے کے لیے سرورز کی ترتیبات میں تبدیلی کا عمل جاری ہے۔