ایس سی او، ای سی او اجلاسوں بارے متعلقہ ادارے مؤثر ہم آہنگی یقینی بنائیں: اسحاق ڈار

نائب وزیراعظم اور وزیر خارجہ سینیٹر محمد اسحاق ڈار کی زیر صدارت وزارتِ خارجہ میں ایک اہم اجلاس منعقد ہوا، جس میں 2027ء کے دوران وفاقی دارالحکومت اسلام آباد میں شیڈول کثیرالجہتی بین الاقوامی اجلاسوں کی تیاریوں کا تفصیلی جائزہ لیا گیا۔ ترجمان دفترِ خارجہ کے مطابق اجلاس میں اقتصادی تعاون تنظیم (ای سی او) کے وزرائے خارجہ کونسل کے اجلاس اور شنگھائی تعاون تنظیم (ایس سی او) کے سربراہانِ مملکت کونسل (کونسل آف ہیڈز آف اسٹیٹس) کے اجلاس کے انتظامات سمیت پاکستان کی سفارتی ترجیحات، علاقائی تعاون، اقتصادی شراکت داری اور علاقائی روابط کے فروغ سے متعلق امور زیرِ بحث آئے۔ اس موقع پر نائب وزیراعظم اسحاق ڈار نے ہدایت کی کہ تمام متعلقہ ادارے ان مجوزہ عالمی اجلاسوں کے کامیاب انعقاد کے لیے قریبی رابطے اور مؤثر ہم آہنگی کو یقینی بنائیں، کیونکہ جامع اور ٹھوس تیاریوں کے ذریعے مشترکہ مفادات کو آگے بڑھانے اور کثیرالجہتی تنظیموں سمیت علاقائی شراکت داروں کے ساتھ پاکستان کے تعلقات کو مزید مستحکم بنانے میں مدد ملے گی۔