پاکستان 2050 سے پہلے دنیا کی بڑی معیشتوں میں شامل ہوگا: شہباز شریف

وزیراعظم شہباز شریف نے کہا ہے کہ پاکستان کی معیشت نئے عزم اور اعتماد کے ساتھ ترقی اور تبدیلی کے سفر پر گامزن ہے، اور ان شاء اللہ 2050 سے بھی پہلے پاکستان دنیا کی بڑی معیشتوں میں شامل ہو جائے گا۔ وفاقی دارالحکومت میں پاکستان منرلز انویسٹمنٹ فورم 2026 سے خطاب کرتے ہوئے انہوں نے کانفرنس میں شریک عالمی سرمایہ کاروں کا خیرمقدم کیا اور بیرک کمپنی کا پاکستان پر اعتماد برقرار رکھنے پر شکریہ ادا کیا۔ وزیراعظم نے کہا کہ گولڈمین سکس کی پیشگوئی کے مطابق پاکستان 2075 تک دنیا کی چھٹی بڑی معیشت بن سکتا ہے، تاہم ہمارا ہدف اس سے بھی پہلے معاشی اہداف حاصل کرنا ہے۔ انہوں نے دوٹوک الفاظ میں کہا کہ پاکستان کے قیمتی معدنی وسائل کو اب خام شکل میں بیرون ملک بھیجنا بند کیا جائے گا، بلکہ انہیں ملکی ڈاؤن اسٹریمنڈسٹری اور صنعتوں کے لیے بروئے کار لایا جائے گا، جبکہ دو دہائیوں سے تعطل کا شکار ریکوڈک منصوبہ اب عملی تکمیل اور آپریشنل مرحلے کی جانب تیزی سے بڑھ رہا ہے۔ وزیراعظم نے یقین دہانی کرائی کہ سرمایہ کاروں کو پالیسیوں میں تسلسل، یکساں مواقع اور لائسنس کے اجرا میں مکمل شفافیت فراہم کی جائے گی، اور اس مقصد کے لیے وفاقی و صوبائی حکومتیں مل کر کام کر رہی ہیں۔