روس میں شاپنگ مال کو بم سے اڑانے کی سازش ناکام، وسط ایشیائی ملزم گرفتار

روس کے وفاقی سیکیورٹی ادارے (ایف ایس بی) نے جنوبی روس کے شہر ستاوروپول میں ایک شاپنگ مال کو بم دھماکے سے نشانہ بنانے کی دہشت گردی کی سازش ناکام بناتے ہوئے وسطی ایشیا کے ایک ملک سے تعلق رکھنے والے مشتبہ شخص کو گرفتار کر لیا ہے۔ ایف ایس بی کے تعلقات عامہ مرکز کے مطابق گرفتار ملزم روس میں کالعدم قرار دی گئی ایک بین الاقوامی دہشت گرد تنظیم کا رکن ہے، جس نے تنظیم کے سربراہ سے وفاداری کا عہد پورا کرنے کے لیے شاپنگ مال اور اطراف کی ریکی کی، ویڈیو بنائی اور خودساختہ دھماکا خیز ڈیوائس (آئی ای ڈی) تیار کرنے کا سامان حاصل کر لیا تھا، جبکہ حملے کے بعد اس کا شام فرار ہو کر دہشت گرد صفوں میں شامل ہونے کا منصوبہ تھا۔ سیکیورٹی اہلکاروں نے بروقت کارروائی کرتے ہوئے ملزم کو گرفتار کر کے اس کی رہائش گاہ سے بم بنانے والے پرزے اور رابطے کے آلات برآمد کر لیے جن میں بیرون ملک بیٹھے ہینڈلر کی ہدایات موجود تھیں۔ ایف ایس بی نے ملزم کے اعترافی بیان کی ویڈیو بھی جاری کر دی ہے اور اس کے خلاف روسی فوجداری قانون کے تحت دہشت گردی کا مقدمہ درج کر لیا گیا ہے، جس میں جرم ثابت ہونے پر ملزم کو 10 سال تک قید کی سزا ہو سکتی ہے۔