28ویں آئینی ترمیم کا مسودہ ابھی تک میرے پاس نہیں آیا: سپیکر قومی اسمبلی

اسپیکر قومی اسمبلی سردار ایاز صادق نے واضح کیا ہے کہ 28ویں آئینی ترمیم کا مسودہ ابھی تک ان کے پاس نہیں آیا اور وزارتِ پارلیمانی امور کی جانب سے مسودہ موصول ہونے کے بعد ہی ان کا آئینی و پارلیمانی کردار شروع ہوگا۔ لاہور میں میڈیا سے گفتگو کرتے ہوئے سردار ایاز صادق کا کہنا تھا کہ مسودہ سامنے آنے پر ہی اس کے مندرجات کا علم ہوگا، اس لیے قبل از وقت ترمیم کے اچھے یا برے ہونے پر کوئی رائے نہیں دی جا سکتی۔ حکومتی شخصیات کی ذمہ داریوں سے متعلق سوال پر انہوں نے کہا کہ حکومت میں ہر شخص اپنی ذمہ داری نبھا رہا ہے اور محسن نقوی کو جو بھی اسائنمنٹ دی جاتی ہے وہ اس پر کام کرتے ہیں، جبکہ چودھری سالک حسین کے بیان کے حوالے سے ان کا کہنا تھا کہ ڈاکٹر کا بیٹا ڈاکٹر بنے تو کوئی اعتراض نہیں کرتا لیکن سیاست دانوں کو موروثی سیاست کے طعنے دیے جاتے ہیں۔ محسن نقوی اور بلاول بھٹو کے ’ری سیٹ‘ سے متعلق بیانات پر تبصرہ کرتے ہوئے اسپیکر قومی اسمبلی نے مزید کہا کہ ہر کسی کی اپنی سوچ ہوتی ہے، تاہم ان کے نزدیک نظام میں بہتری کی گنجائش ہمیشہ موجود رہتی ہے۔