ملک میں ہفتہ وار مہنگائی کی شرح میں 0.46 فیصد کمی، سالانہ شرح 11.21 فیصد ریکارڈ

ادارہ شماریات پاکستان (پی بی ایس) کی جانب سے جاری کردہ ہفتہ وار اعدادوشمار کے مطابق ملک میں مہنگائی کی شرح میں 0.46 فیصد کی کمی ریکارڈ کی گئی ہے جبکہ سالانہ بنیادوں پر مہنگائی بڑھنے کی مجموعی شرح 11.21 فیصد رہی ہے۔ ادارہ شماریات کی رپورٹ کے مطابق گزشتہ ایک ہفتے کے دوران 19 اشیائے ضروریہ کی قیمتوں میں اضافہ، 9 اشیا سستی ہوئیں جبکہ 23 اشیا کی قیمتیں مستحکم رہیں؛ ہفتہ وار بنیادوں پر ٹماٹر 12.06 فیصد، انڈے 5.98 فیصد، آلو 2.42 فیصد، لہسن 1.76 فیصد، مرغی 1.32 فیصد اور آٹا 0.94 فیصد مہنگا ہوا، جبکہ پیٹرول 7.42 فیصد اور ڈیزل 6.10 فیصد سستا ہوا۔ دوسری جانب سالانہ بنیادوں پر ایل پی جی کی قیمت میں 111.35 فیصد، بجلی کے نرخوں میں 52.38 فیصد اور آٹے کی قیمت میں 36.14 فیصد اضافہ ریکارڈ کیا گیا، جبکہ اس کے برعکس سالانہ بنیادوں پر آلو 36.41 فیصد، چینی 24.54 فیصد اور انڈے 23.29 فیصد سستے ہوئے۔