مائیکروسافٹ کا چینی ساختہ آلات پر عائد پابندی کا منصوبہ روکنے کا مطالبہ

امریکی ٹیکنالوجی کمپنی مائیکروسافٹ نے ٹرمپ انتظامیہ پر زور دیا ہے کہ وہ مصنوعی ذہانت (AI) کے ڈیٹا سینٹرز میں استعمال ہونے والے چینی ساختہ اہم آلات کی درآمد پر پابندی عائد کرنے کا منصوبہ فوری طور پر روک دے۔

امریکی حکومت چینی ساختہ ‘آپٹیکل ٹرانسیورز’ (Optical Transceivers) کی درآمد پر پابندی عائد کرنے پر غور کر رہی ہے، جو ڈیٹا سینٹرز میں فائبر آپٹک کیبلز کے ذریعے انتہائی تیز رفتاری سے ڈیٹا منتقل کرنے کے لیے استعمال ہوتے ہیں۔ امریکی حکام کو خدشہ ہے کہ چین ان آلات کے ذریعے ڈیٹا چوری، نقصان دہ سافٹ ویئر کی تنصیب یا امریکی ڈیٹا سینٹرز کی سروس متاثر کر سکتا ہے۔

مائیکروسافٹ سمیت کئی ٹیکنالوجی کمپنیوں نے مؤقف اختیار کیا ہے کہ مجوزہ پابندی سے امریکا میں ڈیٹا سینٹرز کی تعمیر شدید متاثر ہوگی، جس سے اے آئی کی عالمی دوڑ میں امریکا کی برتری کو نقصان پہنچ سکتا ہے۔ مائیکروسافٹ کے اس وقت امریکا میں 35 ڈیٹا سینٹرز زیرِ تعمیر جبکہ مزید 134 التوا کا شکار یا منصوبہ بندی کے مراحل میں ہیں۔ صنعت کے ماہرین کے مطابق اگرچہ امریکی کمپنیوں کے پاس اے آئی چپس موجود ہیں، لیکن آپٹیکل ٹرانسیورز کے بغیر ان چپس کا موثر استعمال ناممکن ہے۔ واضح رہے کہ چین عالمی آپٹیکل ٹرانسیور مارکیٹ کے تقریباً دو تہائی حصے (Two-Thirds) پر قابض ہے۔