اٹلی کی وزیراعظم نے ایران کیخلاف جنگ میں تعاون کے دعوے کی تردید کردی

اٹلی کی وزیراعظم جارجیا میلونی نے ایران کے خلاف کسی بھی جنگی یا فوجی کارروائی میں امریکہ کا ساتھ دینے کے دعووں کی سختی سے تردید کر دی ہے۔فرانسیسی صدر ایمانوئل میکرون کے ہمراہ ایک اہم مشترکہ پریس کانفرنس کے دوران اطالوی وزیراعظم جارجیا میلونی نے نیٹو (NATO) کے نئے سیکریٹری جنرل مارک روٹے کے اس حالیہ دعوے کو یکسر مسترد کر دیا جس میں انہوں نے اطالوی فوجی اڈوں کے استعمال کا اشارہ دیا تھا۔ جارجیا میلونی نے واشنگٹن اور تہران کے درمیان جاری شدید کشیدگی پر ملک کا پوزیشن واضح کرتے ہوئے کہا کہ اٹلی نے کبھی بھی ایران امریکہ تنازع یا کسی براہِ راست فوجی کارروائی میں حصہ نہیں لیا۔اطالوی وزیراعظم نے پریس کانفرنس میں دفاعی معاہدوں کی حدود کی وضاحت کرتے ہوئے کہا کہ امریکی افواج کو اطالوی تنصیبات سے جو بھی سہولت حاصل تھی، وہ محض تکنیکی اور لاجسٹک معاونت تک محدود تھی اور اسے کسی بھی طور پر ایران کے خلاف جنگی مشن کی منظوری نہیں سمجھا جا سکتا۔واضح رہے کہ یہ سفارتی اور سیاسی تنازع اس وقت کھڑا ہوا جب گزشتہ روز نیٹو کے سیکریٹری جنرل مارک روٹے نے ایک سنسنی خیز دعویٰ کیا تھا کہ امریکہ کے مشرقِ وسطیٰ میں جاری “آپریشن ایپک فیوری” (Operation Epic Fury) کے دوران اٹلی میں قائم فوجی اڈوں سے لگ بھگ 500 امریکی جنگی طیاروں نے اڑان بھری تھی۔ اس بیان کے بعد اٹلی کی حکومت کو ملکی سیاست اور اپوزیشن کی جانب سے شدید تنقید کا سامنا کرنا پڑ رہا تھا، جس پر اب خود وزیراعظم نے پریس کانفرنس کر کے پوزیشن واضح کی ہے۔