پری کوارٹر فائنل میں شکست ، برازیل فیفا ورلڈ کپ سے باہر ، اسٹار کھلاڑی نیمار کا ریٹائرمنٹ کا اعلان

فیفا ورلڈ کپ 2026 کے پری کوارٹر فائنل میچ میں سنسنی خیز مقابلے کے بعد ناروے نے 5 بار کی عالمی چیمپئن برازیل کو 1-2 سے شکست دے کر ایونٹ سے باہر کر دیا۔ اس مایوس کن شکست اور ورلڈ کپ جیتنے کا خواب ٹوٹنے پر برازیل کے اسٹار کھلاڑی نیمار جونیئر آبدیدہ ہو گئے اور انہوں نے انٹرنیشنل فٹبال سے ریٹائرمنٹ کا باقاعدہ اعلان کر دیا۔

نیوجرسی میں کھیلے گئے اس اہم میچ میں ناروے کی جانب سے اسٹار اسٹرائیکر ایرلنگ ہالینڈ نے شاندار کھیل کا مظاہرہ کرتے ہوئے دو گول اسکور کیے۔ ہالینڈ نے پہلا گول 79ویں منٹ میں اور دوسرا فیصلہ کن گول 90ویں منٹ میں کر کے اپنی ٹیم کو مضبوط برتری دلائی۔ برازیل کی جانب سے واحد گول میچ کے آخری لمحات میں نیمار جونیئر نے پنالٹی کک پر اسکور کیا، تاہم وہ اپنی ٹیم کو شکست سے نہ بچا سکے۔ اس تاریخی فتح کے ساتھ ہی ناروے کی ٹیم میگا ایونٹ کی تاریخ میں پہلی مرتبہ کوارٹر فائنل میں پہنچ گئی ہے۔ نیمار نے اپنے  الوداعی بیان میں کہا کہ  میں  نے جیت کے لیئے  پوری کوشش کی، میرا انٹرنیشنل کیریئر اسی اسٹیڈیم (نیوجرسی) سے شروع ہوا تھا اور میں نے یہیں اس کا اختتام کیا۔ اب یہ سب ختم ہو چکا ہے۔

34 سالہ نیمار نے برازیل کے لیے اپنے انٹرنیشنل کیریئر کا آغاز 10 اگست 2010 کو امریکا کے خلاف ایک دوستانہ میچ سے کیا تھا، جو اسی ایسٹ ردرفورڈ، نیوجرسی کے اسٹیڈیم میں کھیلا گیا تھا۔

نیمار اپنے بین الاقوامی کیریئر کا اختتام برازیل کے تاریخ کے سب سے زیادہ گول کرنے والے کھلاڑی کے طور پر کر رہے ہیں۔ انہوں نے اپنے کیریئر میں مجموعی طور پر 80 گول اسکور کیے، جو برازیل کے لیجنڈری کھلاڑی پیلے کے ریکارڈ سے 3 گول زیادہ ہیں۔ مزید برآں، فیفا ورلڈ کپ کے ایک اور میچ میں فرانس نے پیراگوئے کو شکست دے کر کوارٹر فائنل کے لیے کوالیفائی کر لیا ہے۔