نیویارک میں چھوٹا مسافر طیارہ دریا میں گر کر تباہ، معجزاتی طور پر تمام افراد بحفاظت ریسکیو، ویڈیو سامنے آگئی

امریکا میں ایک چھوٹا مسافر طیارہ دریا میں گر کر تباہ ہو گیا، تاہم خوش قسمتی سے کوئی جانی نقصان نہیں ہوا اور تمام افراد کو بحفاظت نکال لیا گیا۔ واقعے کی دل دہلا دینے والی ویڈیو بھی منظرِ عام پر آ گئی ہے۔

غیر ملکی میڈیا رپورٹ کے مطابق، یہ حادثہ نیویارک کے علاقے ایسٹ ریور میں پیش آیا، جہاں ایک سی پلین (پانی پر اترنے والا طیارہ) نے اتوار کی صبح ہنگامی لینڈنگ کی۔ لینڈنگ کے دوران طیارہ اپنا توازن برقرار نہ رکھ سکا، جس کے باعث وہ پانی میں شدید ہچکولے کھانے لگا اور تقریباً الٹنے کے قریب پہنچ گیا۔

سوشل میڈیا پر سامنے آنے والی ویڈیوز میں دیکھا جا سکتا ہے کہ طیارہ تیز لہروں کے درمیان پانی میں ڈول رہا ہے جبکہ امدادی کشتیاں تیزی سے موقع پر پہنچ رہی ہیں۔ نیویارک فائر ڈیپارٹمنٹ اور دیگر امدادی ٹیموں نے فوری کارروائی کرتے ہوئے طیارے میں سوار افراد کو بحفاظت ریسکیو کر کے محفوظ مقام پر منتقل کیا۔

حکام کے مطابق، اس حادثے میں دو مسافر معمولی زخمی ہوئے ہیں جنہیں موقع پر ہی ابتدائی طبی امداد فراہم کر دی گئی، جبکہ کوئی جانی نقصان نہیں ہوا۔ طیارے کے دریا میں گرنے اور ہنگامی لینڈنگ کی وجوہات معلوم کرنے کے لیے تحقیقات کا آغاز کر دیا گیا ہے۔