آبنائے ہرمز میں بارودی سرنگوں کی صفائی کیلیے فرانس کا بڑا اقدام

فرانس نے آبنائے ہرمز میں تجارتی و بحری آمدورفت کے تحفظ اور پانیوں کو بارودی سرنگوں سے پاک کرنے کے لیے اپنے خصوصی ‘مائن ہنٹرز’ (بارودی سرنگیں تلاش کرنے والے بحری جہاز) خطے میں تعینات کر دیے ہیں۔

سوشل میڈیا پلیٹ فارم ایکس (سابقہ ٹوئٹر) پر جاری کردہ ایک بیان میں فرانسیسی صدر ایمانوئل میکرون نے اس بحری مشن کی تصدیق کی ہے۔ صدر میکرون کا کہنا ہے کہ فرانسیسی مائن ہنٹرز اپنے بین الاقوامی شراکت داروں کے ساتھ مل کر آبنائے ہرمز میں بین الاقوامی جہاز رانی کے تحفظ اور بحری تجارتی راستوں کی مکمل بحالی کو یقینی بنانے کے لیے پوری طرح تیار ہیں۔

صدر ایمانوئل میکرون نے مزید بتایا کہ عمانی حکام کے ساتھ قریبی مشاورت اور رابطوں کے بعد فرانس کے سب سے بڑے طیارہ بردار بحری جہاز ‘چارلس ڈیگال’ کو بندرگاہ پر واپس بلانے کا فیصلہ کیا گیا ہے۔ تاہم، انہوں نے واضح کیا کہ بارودی سرنگوں سے نمٹنے والے فرانسیسی بحری اثاثے، جنگی کشتیاں اور ان کا حفاظتی دستہ اسی علاقے میں موجود رہے گا تاکہ کسی بھی ہنگامی یا ممکنہ کارروائی کا فوری جواب دیا جا سکے۔

واضح رہے کہ گزشتہ ماہ کے آخر میں جب صدر میکرون نے اس منصوبے کا پہلی بار اعلان کیا تھا، تو ایران نے آبنائے ہرمز میں کسی بھی قسم کی فرانسیسی شمولیت اور مداخلت کو سخت الفاظ میں مسترد کر دیا تھا۔ تاہم، ایران کی مخالفت کے باوجود فرانس نے اب اس حساس مشن کے تحت اپنی بحری صلاحیتوں کو عملی طور پر خطے میں فعال کر دیا ہے۔