سابق وزیراعظم آزاد کشمیر سردار تنویر الیاس پر بھائیوں کے ہوٹل پر قبضے کا الزام، مقدمہ درج

سابق وزیراعظم آزاد کشمیر سردار تنویر الیاس پر اپنے بھائیوں کے ہوٹل پر زبردستی قبضہ کرنے کا الزام عائد کر دیا گیا ہے، جس پر تھانہ کینٹ پولیس نے سردار تنویر الیاس سمیت 13 افراد کے خلاف مقدمہ درج کر لیا ہے۔

پولیس کے مطابق یہ مقدمہ راجہ شہزاد سلطان کی مدعیت میں درج کیا گیا ہے۔ مقدمے کے متن میں الزام لگایا گیا ہے کہ سردار تنویر الیاس کے سپروائزر نے مسلح افراد کے ہمراہ آدم جی روڈ پر واقع الشمس ہوٹل پر دھاوا بولا، جو سردار یاسر الیاس اور سردار راشد الیاس کی ملکیت ہے۔

مقدمے میں کہا گیا ہے کہ ملزمان نے اسلحے کے زور پر ہوٹل کے عملے کو تشدد کا نشانہ بنایا اور جان سے مارنے کی دھمکیاں دیں۔ سردار تنویر الیاس کے سپروائزر نے مسلح افراد کے ساتھ عملے کو کہا کہ یہ ہوٹل سردار تنویر الیاس کا ہے اور اسے فوری طور پر خالی کر دیا جائے۔

مزید الزام ہے کہ سپروائزر اکرام الحق نے ہوٹل کے سیکیورٹی گارڈ کو حبسِ بے جا میں رکھا جبکہ کارندوں نے اسلحے کے زور پر ہوٹل پر قبضہ کر لیا۔

تھانہ کینٹ پولیس نے مقدمہ درج کر کے واقعے کی تحقیقات شروع کر دی ہیں، جبکہ پولیس کا کہنا ہے کہ شواہد کی روشنی میں مزید قانونی کارروائی عمل میں لائی جائے گی۔