افغانستان کے سابق فاسٹ بولر شاپور زدران انتقال کر گئے

افغانستان کے سابق مایہ ناز فاسٹ بولر شاپور زدران 38 سال کی عمر میں انتقال کر گئے۔ افغانستان کرکٹ بورڈ (ACB) نے ان کے انتقال کی باقاعدہ تصدیق کر دی ہے۔

شاپور زدران گزشتہ کچھ عرصے سے کینسر کے موذی مرض میں مبتلا تھے اور بھارت کے ایک مقامی ہسپتال میں زیرِ علاج تھے۔ افغانستان کرکٹ بورڈ نے سابق کرکٹر کے کینسر کے خلاف طویل لڑائی کے بعد انتقال پر گہرے دکھ اور افسوس کا اظہار کیا ہے۔

افغان کرکٹ بورڈ کے مطابق، مرحوم شاپور زدران کے جنازے کی تفصیلات کا اعلان ان کے خاندان والوں کی مشاورت کے بعد بعد میں کیا جائے گا۔ شاپور زدران افغانستان کرکٹ کے ابتدائی دور کے کھلاڑیوں میں سے تھے جنہوں نے اپنی کارکردگی سے افغان کرکٹ کو عالمی سطح پر روشناس کروانے میں اہم کردار ادا کیا۔ ان کی بیماری کے دوران افغانستان کے متعدد کرکٹرز بھارتی ہسپتال میں ان کی عیادت کے لیے بھی جاتے رہے ہیں۔ یاد رہے کہ شاپور زدران نے انٹرنیشنل کرکٹ میں افغانستان کی بھرپور نمائندگی کی، انہوں نے مجموعی طور پر 44 ون ڈے انٹرنیشنل اور 36 ٹی ٹوئنٹی انٹرنیشنل میچز کھیلے اور کئی یادگار فتوحات میں اہم کردار ادا کیا