ورلڈ کپ 2027 کیلئے پاکستان کا کمبی نیشن بہت اچھا بنا ہوا ہے: فخر زمان

پاکستان قومی کرکٹ ٹیم کے مایہ ناز اوپننگ بیٹر فخر زمان نے کہا ہے کہ آئی سی سی ون ڈے ورلڈ کپ 2027ء کے لیے قومی ٹیم کا کمبی نیشن انتہائی متوازن اور مضبوط بن رہا ہے، اور اس وقت ڈومیسٹک و بین الاقوامی میچوں میں جس نوعیت کی وکٹیں تیار کی جا رہی ہیں، ان کو دیکھ کر صاف ظاہر ہوتا ہے کہ تمام کھلاڑیوں کا فوکس اور ہدف صرف ورلڈ کپ ہی ہے۔

راولپنڈی میں میڈیا نمائندگان سے گفتگو کرتے ہوئے فخر زمان نے بتایا کہ اس وقت ٹیم کے تمام کھلاڑی ڈومیسٹک سیزن کھیل کر میدان میں آ رہے ہیں اور بہترین فارم میں ہیں۔ انہوں نے تسلیم کیا کہ اس وقت پاکستان کرکٹ ٹیم کی حالیہ کارکردگی پر شائقین کرکٹ مکمل طور پر خوش نہیں ہیں، تاہم جب بھی ٹیم گراؤنڈ میں اچھا کھیل پیش کرتی ہے تو عوام بے پناہ محبت اور حمایت فراہم کرتی ہے۔

فخر زمان نے مزید کہا کہ ہر سینئر اور جونیئر کرکٹر کی یہی کوشش ہوتی ہے کہ وہ ملک کے لیے میدان میں اپنا سو فیصد دے۔ انہوں نے واضح کیا کہ ون ڈے (ODI) کرکٹ ان کا سب سے پسندیدہ فارمیٹ ہے، اسی لیے وہ آنے والے ون ڈے سیریز اور آئی سی سی ورلڈ کپ کے چیلنجز کے لیے خاصے پُرجوش اور پرعزم ہیں۔