سہ فریقی سکیورٹی معاہدہ آسٹریلیا کو مزید غیر محفوظ بنا دے گا: سابق وزیراعظم میلکم ٹرن

آسٹریلیا کے سابق وزیراعظم میلکم ٹرن بُل نے خبردار کیا ہے کہ اگر ملک نے اپنی موجودہ دفاعی پالیسی تبدیل نہ کی تو آسٹریلیا مزید غیر محفوظ، کمزور اور اپنے فیصلے خود کرنے کی صلاحیت سے محروم ہو جائے گا۔ عالمی میڈیا رپورٹس کے مطابق سڈنی میں نیو ساؤتھ ویلز پارلیمنٹ ہاؤس میں برطانیہ اور امریکا کے ساتھ طے پانے والے سہ فریقی دفاعی معاہدے (AUKUS) پر بحث کے دوران خطاب کرتے ہوئے سابق وزیراعظم نے کہا کہ اس شراکت داری نے آسٹریلیا کو امریکا کا مزید محتاج بنا دیا ہے۔ انہوں نے واضح کیا کہ معاہدے کے تحت مجوزہ جوہری آبدوزوں کا ملنا آسٹریلیا کے ہاتھ میں نہیں بلکہ امریکا اور برطانیہ کے فیصلوں پر منحصر ہے، جو کہ آسٹریلوی خودمختاری کی بہت بڑی قربانی ہے۔ اس موقع پر سماعت کے مقام کے باہر شہریوں کی جانب سے معاہدے کے خلاف شدید احتجاج بھی کیا گیا، جبکہ پبلک انکوائری کمیٹی آسٹریلیا کی خودمختاری، سیکورٹی اور جوہری فضلے کی تلفی کے اثرات کا جائزہ لے کر اکتوبر تک اپنی رپورٹ پیش کرے گی۔