اتنے بڑے ہاتھ نہیں بانی کے اکاؤنٹ سے اپنے لئے ٹویٹس کروں: مشعال یوسفزئی

پاکستان تحریک انصاف (پی ٹی آئی) کی سینیٹر مشعال یوسفزئی نے میڈیا سے گفتگو کرتے ہوئے ان کی طرف سے بانی پی ٹی آئی کے اکاؤنٹ کے استعمال سے متعلق تاثر کی نفی کی اور کہا کہ ان کے پاس اتنے اختیارات یا رسائی نہیں کہ وہ عمران خان کے آفیشل سوشل میڈیا اکاؤنٹ سے اپنے حق میں ٹویٹس کر سکیں۔ گفتگو کے دوران انہوں نے سلمان اکرم راجہ کے ساتھ پیدا ہونے والے تحفظات کا ذکر کرتے ہوئے سوال اٹھایا کہ کیا سینیٹر بننے کے بعد سلمان اکرم نے اڈیالہ جیل میں بانی پی ٹی آئی کے سامنے ان سے معافی نہیں مانگی تھی؟ سینیٹر مشعال یوسفزئی کے مطابق سلمان اکرم نے بانی پی ٹی آئی کے سامنے تسلیم کیا تھا کہ ان سے غلطی ہوئی ہے اور وہ آئندہ ایسا نہیں کریں گے۔