محسن نقوی کی ایرانی صدر سے ملاقات، باہمی دلچسپی کے امور پر تبادلہ خیال

پاکستان کے وفاقی وزیر داخلہ محسن نقوی نے تہران میں ایرانی صدر ڈاکٹر مسعود پزشکیان سے اہم ملاقات کی ہے جس میں دوطرفہ تعلقات، علاقائی سیکیورٹی اور باہمی دلچسپی کے تمام امور پر تفصیلی تبادلہ خیال کیا گیا۔ ملاقات کے بعد ایرانی صدر مسعود پزشکیان نے گفتگو کرتے ہوئے کہا کہ ایران تمام شعبوں میں پاکستان کے ساتھ مشترکہ تعاون کی راہ ہموار کرنے کے لیے مکمل تیار ہے، کیونکہ دوطرفہ تعلقات کے استحکام سے ہی باہمی مفادات کی ضمانت اور علاقائی امن یقینی بنایا جا سکتا ہے۔ انہوں نے وزیراعظم شہباز شریف کی جانب سے پاک ایران تعلقات کی مضبوطی میں دلچسپی کو قابلِ قدر قرار دیا۔ اس موقع پر وزیر داخلہ محسن نقوی نے کہا کہ پاکستان اور ایران کے تعلقات ناقابلِ تنسیخ ہیں اور اسلام آباد ان روابط کو زیادہ جامع بنانے کے لیے انتہائی سنجیدہ اور عزم کے ساتھ اقدامات کر رہا ہے۔