چین کا بھارت کے غیر قانونی قائم کردہ ’’اروناچل پردیش‘‘ کو تسلیم کرنے سے انکار

چین نے بھارت کے غیر قانونی طور پر قائم کردہ نام نہاد علاقے ’’اروناچل پردیش‘‘ کو تسلیم کرنے سے صاف انکار کرتے ہوئے بھارتی اقدام کو کالعدم قرار دے دیا ہے۔ چین کی وزارتِ خارجہ کے ترجمان گو جیاکون نے بھارت کی جانب سے 7 اگست کو مذکورہ علاقے کے 27 مقامات کے نام نہاد ’’معیاری نام‘‘ جاری کیے جانے کے ردعمل میں واضح کیا کہ ژانگ نان خطہ چین کا تاریخی اور قانونی علاقہ ہے۔ انہوں نے کہا کہ چین میں طویل عرصے سے استعمال ہونے والے جغرافیائی ناموں کو اپنے ناموں سے تبدیل کرنے کی بھارتی کوشش مکمل طور پر غیر قانونی اور بے اثر ہے۔ ترجمان کا مزید کہنا تھا کہ بھارت کے اس طرح کے یکطرفہ اقدامات سے اس حقیقت پر کوئی اثر نہیں پڑے گا کہ ژانگ نان کا علاقہ چین کا ناقابل تنسیخ حصہ ہے۔