طالبان کے اقتدار پر قبضے کے بعد 24 لاکھ افغان لڑکیاں ثانوی تعلیم سے محروم

اقوامِ متحدہ کے تعلیمی، سائنسی و ثقافتی ادارے (یونیسکو) نے انکشاف کیا ہے کہ 2021 میں طالبان کے اقتدار پر قبضے کے بعد سے اب تک تقریباً 24 لاکھ افغان لڑکیاں ثانوی تعلیم سے محروم ہو چکی ہیں۔ یونیسکو کے مطابق افغانستان دنیا کا واحد ملک ہے جہاں خواتین اور لڑکیوں پر ثانوی اور اعلیٰ تعلیم حاصل کرنے پر باضابطہ پابندی عائد ہے۔ عالمی برادری سے وعدوں کے باوجود طالبان نے مارچ 2022 میں لڑکیوں کے ثانوی سکول اور دسمبر 2022 میں یونیورسٹیاں بند کر دیں، جنہیں عارضی قرار دینے کے باوجود تاحال بحال نہیں کیا گیا۔ رپورٹ کے مطابق افغانستان میں شرحِ خواندگی صرف 37 فیصد رہ گئی ہے اور 10 سال کی عمر کے 90 فیصد سے زائد بچے سادہ عبارت پڑھنے سے بھی قاصر ہیں۔ ادارے نے خبردار کیا ہے کہ اس پابندی کے باعث ملک میں خواتین اساتذہ کی پہلے سے موجود شدید کمی مزید بحران اختیار کر سکتی ہے۔