ارجنٹینا سے میچ میں مصر نے ریفریز کیخلاف فیفا میں باضابطہ شکایت درج کرادی

مصری فٹبال فیڈریشن نے ارجنٹینا کے خلاف پری کوارٹر فائنل میچ میں ہونے والی مبینہ ناانصافیوں پر عالمی فٹبال گورننگ باڈی (فیفا) سے باضابطہ شکایت درج کراتے ہوئے فرانسیسی ریفری فرانسوا لیٹیکسیئر اور وی اے آر (VAR) حکام کو ورلڈ کپ سے باہر کرنے کا مطالبہ کر دیا ہے۔

مصری فیڈریشن کا الزام ہے کہ ریفری اور وی اے آر نے سنگین غلطیاں اور دوہرا معیار اپنایا، جس کے باعث مصر کو ورلڈ کپ سے باہر ہونا پڑا۔ میچ کے دوران مصر کا ایک گول تقریباً 100 گز دور ہونے والے مبینہ فاؤل کی بنیاد پر مسترد کیا گیا، جبکہ کپتان محمد صلاح کو گرائے جانے اور پنالٹی کے دیگر واضح مواقع پر ویڈیو ریویو سے دانستہ گریز کیا گیا۔ ان متنازع فیصلوں پر مصری ہیڈ کوچ حسام حسن کے شدید احتجاج پر ریفری نے انہیں یلو کارڈ بھی دکھایا۔ مصری فٹبال فیڈریشن نے مؤقف اختیار کیا ہے کہ ٹیم کے ساتھ سراسر امتیازی سلوک ہوا ہے، لہذا فیفا اس معاملے کی مکمل تحقیقات کرے۔ واضح رہے کہ اس میچ میں ارجنٹینا نے مصر کو 2-3 سے شکست دے کر کوارٹر فائنل کے لیے کوالیفائی کیا تھا۔