فرش پر 362 کلو پی نَٹ بٹر پھیلا کر فنکار کو انوکھا خراجِ عقیدت

نیدرلینڈز میں معروف اور روایات سے ہٹ کر کام کرنے والے تصوراتی فنکار (Conceptual Artist) وِم ٹی-شپرز کو منفرد انداز میں خراجِ عقیدت پیش کرنے کے لیے ایک میوزیم کے فرش پر 362 کلوگرام سے زائد پی نٹ بٹر (مونگ پھلی کا مکھن) پھیلا دیا گیا ہے۔ روٹرڈیم میں واقع ’ڈیپوٹ، میوزیم بوئجمانس فان بیوننگن‘ میں اس عجیب و غریب فن پارے کو دو ماہ کی نمائش کے لیے عوام کے سامنے پیش کیا گیا ہے۔ اس میں استعمال ہونے والا پی نٹ بٹر تقریباً 15 ہزار سینڈوچز بنانے کے لیے کافی ہے۔

وِم ٹی-شپرز، جن کا گزشتہ ماہ 83 سال کی عمر میں انتقال ہو گیا تھا، نے پہلی بار یہ تخلیق جسے ’پنڈاکاس فلور‘ (Pindakaasvloer) کہا جاتا ہے، 1969 میں پیش کی تھی۔ وہ ڈچ زبان میں بچوں کے مشہور شو ’سیسمی اسٹریٹ‘ کے کرداروں ارنی اور کرمٹ دی فراگ کے صداکار بھی رہے۔ ان کے فن پارے روایتی آرٹ کو چیلنج کرنے اور ناظرین کو سوچنے پر مجبور کرنے کے لیے مشہور تھے، جن میں شیشے کے ٹکڑوں اور نمک سے ڈھکے فرش بھی شامل تھے