ڈونلڈ ٹرمپ کی ایران کے معاملے پر اٹلی سمیت نیٹو اتحادیوں پر کڑی تنقید

امریکی صدر ڈونلڈ ٹرمپ نے ایران کے معاملے پر اٹلی سمیت شمالی بحرِ اوقیانوس کے فوجی اتحاد (نیٹو) میں شامل اپنے دیگر یورپی اتحادیوں کو کڑی تنقید کا نشانہ بنایا ہے۔

امریکی صدر ڈونلڈ ٹرمپ نے اپنے ایک سخت بیان میں کہا کہ امریکہ نے کئی دہائیوں تک نیٹو پر کھربوں ڈالر خرچ کیے اور ان ممالک کا دفاع کیا، لیکن جب آزمائش کا وقت آیا تو وہ نہ ہمارے دفاع کے لیے کھڑے ہوئے اور نہ ہی باقی دنیا کے کام آئے، جو کہ ایک انتہائی مایوس کن امر ہے۔ انہوں نے خاص طور پر اٹلی پر برہمی کا اظہار کرتے ہوئے کہا کہ اٹلی اور اس کی وزیراعظم ایران اور اس کے سنگین جوہری خطرے کے خلاف کسی بھی قسم کی کارروائی میں شمولیت کا سوچ بھی نہیں رہے۔

امریکی اخبار نیویارک ٹائمز کی ایک رپورٹ کو یکسر مسترد کرتے ہوئے صدر ٹرمپ نے کہا کہ اخبار کا یہ دعویٰ بالکل غلط ہے کہ 4 ماہ کی ایران جنگ کے بعد خطے میں کوئی بڑی تبدیلی نہیں آئی۔ انہوں نے دعویٰ کیا کہ اس فوجی کارروائی کے نتیجے میں ایران کی فوج، بحریہ اور فضائیہ کا نیٹ ورک تقریباً ختم ہو چکا ہے۔

امریکی صدر کا مزید کہنا تھا کہ ایران کے تمام بڑے فوجی لانچنگ پیڈز، میزائل اور خودکش ڈرونز کی تیاری کی صلاحیتیں اب مکمل طور پر تباہ کی جا چکی ہیں اور ایرانی اعلیٰ عسکری قیادت کا شیرازہ بکھر چکا ہے۔ انہوں نے تزویراتی صورتحال کا احاطہ کرتے ہوئے کہا کہ اس وقت تزویراتی اہمیت کی حامل آبنائے ہرمز مکمل طور پر کھلی ہوئی ہے اور وہاں سے عالمی منڈیوں کے لیے تیل کی ترسیل بلا تعطل جاری ہے، جبکہ دوسری جانب امریکی اسٹاک مارکیٹ بھی ریکارڈ سطح پر پہنچ چکی ہے، یہ وہ حقیقی تبدیلیاں ہیں جو ان کی فوجی اور سیاسی حکمتِ عملی کے باعث رونما ہوئی ہیں۔