مہنگائی اور غیر آئینی اقدامات کے خلاف اپوزیشن گرینڈ الائنس کا جمعہ کو ملک گیر احتجاج کا فیصلہ

اپوزیشن گرینڈ الائنس نے جمعہ کے روز ملک بھر میں مہنگائی، گورننس کی خرابی اور غیر آئینی قانون سازی کے خلاف احتجاجی مظاہروں کا اعلان کر دیا ہے۔

تحریک تحفظ آئین پاکستان کی اعلیٰ قیادت کا اہم اجلاس محمود خان اچکزئی کی زیر صدارت منعقد ہوا جس میں ملک کی مجموعی سیاسی اور معاشی صورتحال پر شدید تشویش کا اظہار کیا گیا۔

اعلامیے کے مطابق اجلاس میں حکومت پر گورننس کی ناکامی، بڑھتی ہوئی مہنگائی، بیروزگاری اور امن و امان کی بگڑتی صورتحال کے الزامات عائد کیے گئے۔ اجلاس میں اپوزیشن رہنماؤں نے آئین کی بالادستی پر زور دیا۔

اعلامیے میں مطالبہ کیا گیا کہ سیاسی قیدیوں کو فوری طور پر رہا کیا جائے اور بانی چیئرمین کو فوری طور پر اسپتال منتقل کیا جائے۔

اپوزیشن اتحاد نے ملک بھر میں پٹرولیم مصنوعات کی قیمتوں میں اضافے کی بھی شدید مذمت کی۔

اعلامیے کے مطابق جمعہ کو تمام ضلعی ہیڈکوارٹرز میں احتجاجی ریلیاں نکالی جائیں گی جبکہ جعلی اسمبلی اور غیر آئینی قانون سازی کے خلاف بھی احتجاج کیا جائے گا۔

اپوزیشن رہنماؤں نے اس عزم کا اظہار کیا کہ آئین اور جمہوریت کی بحالی کے لیے جدوجہد جاری رکھی جائے گی۔