کرسٹیانو رونالڈو کب ریٹائرمنٹ لیں گے، بہن نے بڑا انکشاف کردیا

فٹبال کی دنیا کے عظیم ترین کھلاڑی کرسٹیانو رونالڈو کی بہن کاتیا اویرو نے اشارہ دیا ہے کہ فیفا ورلڈ کپ 2026 ان کے بھائی کے شاندار اور تاریخی بین الاقوامی کیریئر کا آخری ٹورنامنٹ ہو سکتا ہے۔

ٹورنٹو میں پرتگال اور کروشیا کے درمیان راؤنڈ آف 32 کے انتہائی اہم میچ سے قبل گفتگو کرتے ہوئے کاتیا اویرو نے کہا کہ یہ ورلڈ کپ رونالڈو کے لیے پرتگالی قومی ٹیم کے ساتھ ایک ’لاسٹ ڈانس‘ (آخری رقص) ثابت ہو سکتا ہے۔ انہوں نے انکشاف کیا کہ انہیں ملنے والی معلومات کے مطابق رونالڈو جلد ہی بین الاقوامی فٹبال کو الوداع کہہ سکتے ہیں، تاہم انہوں نے واضح کیا کہ یہ فیصلہ فوری طور پر نہیں بلکہ ٹورنامنٹ کے اختتام کے بعد سامنے آ سکتا ہے۔

ان کا کہنا تھا کہ ”یہ ان کا آخری ورلڈ کپ ہو سکتا ہے، اس لمحے سے لطف اٹھائیں کیونکہ ایسے کھلاڑی دنیا میں دوبارہ روز روز پیدا نہیں ہوتے۔“ انہوں نے مزید کہا کہ اسی میچ میں مدمقابل کروشیا کے تجربہ کار کپتان لوکا موڈرچ کے لیے بھی یہ آخری عالمی ٹورنامنٹ ثابت ہو سکتا ہے، جو فٹبال کے مداحوں کے لیے اس مقابلے کو ایک یادگار ’لاسٹ ڈانس‘ بناتا ہے۔

حالیہ دنوں میں رونالڈو کو فارم کے حوالے سے کی جانے والی تنقید پر ان کی بہن نے اپنے بھائی کا بھرپور دفاع کرتے ہوئے کہا کہ جو لوگ کرسٹیانو پر تنقید کرتے ہیں وہ دراصل فٹبال کے کھیل کی سمجھ ہی نہیں رکھتے۔ انہوں نے فخر کا اظہار کرتے ہوئے کہا کہ ان کا خاندان رونالڈو کی شاندار کامیابیوں پر سر اٹھا کر جیتا ہے۔ واضح رہے کہ کرسٹیانو رونالڈو اس وقت اپنے ریکارڈ چھٹے ورلڈ کپ ایڈیشن میں کھیل رہے ہیں اور وہ دنیا کے واحد کھلاڑی ہیں جنہوں نے چھ مختلف ورلڈ کپ ٹورنامنٹس میں گول اسکور کرنے کا منفرد ترین اعزاز اپنے نام کر رکھا ہے۔