روئی کے ذخائر میں تاریخی کمی، کپاس کی قلت سے ٹیکسٹائل صنعت کے متاثر ہونے کا خدشہ

ملک میں کپاس کا نیا جننگ سیزن شروع ہونے سے قبل روئی کے ذخائر میں غیر معمولی کمی سامنے آگئی ہے جس کے باعث آنے والے دنوں میں روئی کی شدید قلت اور بعض ٹیکسٹائل ملوں کے غیر فعال ہونے کے خدشات پیدا ہوگئے ہیں۔

چیئرمین کاٹن جنرز فورم احسان الحق کے مطابق ملکی تاریخ میں پہلی بار ایسا ہوا ہے کہ نئے جننگ سیزن کے آغاز سے پہلے روئی کے ذخائر 10 ہزار گانٹھوں سے بھی کم سطح پر آگئے ہیں۔ انہوں نے بتایا کہ پاک افغان سرحد کی بندش کے باعث افغانستان سے تقریباً 5 لاکھ گانٹھ روئی درآمد نہ ہوسکی جبکہ خلیجی جنگ کے سبب درآمدی سرگرمیوں میں تعطل نے بھی مقامی صنعت کو مشکلات سے دوچار کردیا ہے۔

احسان الحق کا کہنا تھا کہ انہی عوامل کے باعث مقامی مارکیٹ میں روئی کی فی من قیمت 22 ہزار روپے جبکہ مؤخر ادائیگی پر 23 ہزار 500 روپے تک پہنچ چکی ہے۔

انہوں نے بتایا کہ ملک میں نیا کاٹن جننگ سیزن عیدالاضحیٰ کے فوری بعد شروع ہونے کا امکان ہے جبکہ جون کے تیسرے ہفتے سے نئی روئی کی فراہمی مقامی ٹیکسٹائل ملوں کی ضروریات پوری کرنے میں مددگار ثابت ہوسکتی ہے۔

چیئرمین کاٹن جنرز فورم نے کہا کہ پاکستان کو روئی میں خود کفیل بنانے کے لیے فوری اور ہنگامی اقدامات ناگزیر ہیں۔ ان کے مطابق کاٹن زونز میں گنے کی کاشت پر مکمل پابندی عائد کرکے روئی اور خوردنی تیل کی درآمدات میں نمایاں کمی لائی جاسکتی ہے جس سے سالانہ اربوں ڈالر کا زرمبادلہ بچایا جاسکتا ہے۔

انہوں نے کہا کہ بھارت نے کپاس کی پیداوار بڑھانے کے لیے 2026 سے 2030 تک 5 ہزار 659 کروڑ روپے مختص کیے ہیں، جس کے تحت جدید بیجوں کی تیاری، موسمیاتی اثرات سے تحفظ اور جننگ فیکٹریوں کی اپ گریڈنگ شامل ہے۔

احسان الحق کے مطابق پاکستان میں اس وقت کپاس کی بوائی جاری ہے لیکن ڈیزل، بجلی اور کھادوں کی قیمتوں میں ریکارڈ اضافے نے کاشتکاروں کی مشکلات بڑھادی ہیں۔ انہوں نے بتایا کہ ڈی اے پی کھاد کی قیمت 16 ہزار روپے فی بیگ جبکہ یوریا کی قیمت 4 ہزار 500 روپے فی بوری تک پہنچ چکی ہے، جس سے فی ایکڑ پیداوار متاثر ہونے کا خدشہ ہے۔