چین کا قمری مشن پیشرفت کی جانب، ’گوانگ ہان محل‘ منصوبے میں اہم سنگِ میل

چین نے چاند پر ’گوانگ ہان محل‘ تعمیر کرنے کے اپنے طویل المدتی ہدف کی جانب ایک اور قدم بڑھا لیا ہے، جہاں خصوصی طور پر تیار کی گئی 100 گرام وزنی اینٹیں کامیابی سے زمین پر واپس پہنچ گئی ہیں۔ یہ اینٹیں چاند کی سخت ترین سطح کو برداشت کرنے کے لیے ڈیزائن کی گئی تھیں اور تقریباً ایک سال کے تجرباتی مشن کے بعد واپس لائی گئیں۔

ماہرین کے مطابق Shenzhou-21 مشن کے ذریعے لائی گئی 34 اینٹیں اپنی پہلی سالانہ مدت میں مکمل محفوظ رہیں، جس سے اندازہ ہوتا ہے کہ مستقبل میں چاند پر طویل مدتی ڈھانچے کی تعمیر ممکن ہوسکتی ہے۔ ابتدائی معائنے کے مطابق تمام اینٹیں اچھی حالت میں ہیں، تاہم ہلکی رنگت کی تبدیلی کے اسباب جاننے کے لیے مزید تحقیق کی جائے گی۔

ٹائم میگزین کی رپورٹ میں بتایا گیا ہے کہ چین چاند پر ’Guanghan Palace‘ نامی ایک تحقیقی مرکز قائم کرنے کا منصوبہ رکھتا ہے، جو ایک روایتی چینی داستان سے متاثر ہے۔ یہ منصوبہ چین کی قمری تحقیق اور مستقل موجودگی کے طویل المدتی خلائی پروگرام کا حصہ ہے۔

ابتدائی منصوبے کے تحت اس مرکز کی تعمیر 2028 میں شروع کرنے اور بنیادی ڈھانچہ 2035 تک مکمل کرنے کا ہدف رکھا گیا ہے، جبکہ چین کے خلانورد 2030 تک چاند پر پہنچنے کا ارادہ رکھتے ہیں۔