چین نے ایران کو ہتھیار فراہم کرنے کی رپورٹس کو بے بنیاد قرار دیا

چین نے ایران کو ہتھیار فراہم کرنے کے حوالے سے گردش کرنے والی تمام رپورٹس کو “مکمل طور پر بے بنیاد” قرار دیتے ہوئے مسترد کر دیا ہے۔ چینی وزارتِ خارجہ کے ترجمان گو جیاکون نے بیجنگ میں پریس بریفنگ کے دوران واضح کیا کہ موجودہ صورتحال انتہائی نازک مرحلے میں داخل ہو چکی ہے اور ایسے میں غلط معلومات کشیدگی میں اضافے کا باعث بنتی ہیں۔ انہوں نے امریکی اقدامات پر کڑی تنقید کرتے ہوئے کہا کہ امریکی بحریہ کی جانب سے ایرانی بندرگاہوں کی ناکہ بندی ایک غیر ذمہ دارانہ اقدام ہے، جس سے خطے میں بڑے فوجی تصادم کا خطرہ پیدا ہو سکتا ہے۔

ترجمان نے مزید کہا کہ مشرقِ وسطیٰ میں امن اور استحکام کی بحالی کے لیے چین اپنی سفارتی کوششیں جاری رکھے گا، تاہم اس بحران کا واحد حل مکمل اور فوری جنگ بندی میں ہی پنہاں ہے۔ دوسری جانب، بیجنگ میں سفارتی سرگرمیوں میں تیزی دیکھی گئی جہاں چینی صدر شی جن پنگ نے سپین کے وزیراعظم اور ابوظہبی کے ولی عہد خالد بن محمد بن زید النہیان سے علیحدہ علیحدہ ملاقاتیں کیں۔ ان ملاقاتوں کا محور عالمی امن اور موجودہ بکھرتے ہوئے بین الاقوامی ڈھانچے کی بحالی تھا۔

چینی صدر شی جن پنگ نے عالمی رہنماؤں سے گفتگو کرتے ہوئے کہا کہ دنیا اس وقت “امن و جنگ اور اتحاد و تصادم” کے ایک اہم تاریخی موڑ پر کھڑی ہے۔ انہوں نے عالمی برادری کو خبردار کیا کہ موجودہ بین الاقوامی نظام انتشار کا شکار ہے، جس کی وجہ بین الاقوامی قوانین کے ساتھ مختلف ممالک کا غیر سنجیدہ رویہ ہے۔ انہوں نے اس بات پر زور دیا کہ موجودہ حالات میں عالمی چیلنجز سے نمٹنے کے لیے قریبی ہم آہنگی اور مشترکہ حکمتِ عملی وقت کی ضرورت بن چکی ہے، تاکہ دنیا کو مزید بڑے بحرانوں سے بچایا جا سکے۔