امریکا: میساچوسٹس کے تعلیمی اداروں میں ریچھ داخل، طلبہ کلاس رومز تک محدود رہے

امریکی ریاست میساچوسٹس کے شہر ووستر میں ایک کم عمر کالا ریچھ دو تعلیمی اداروں میں داخل ہو گیا، جس کے باعث انتظامیہ کو حفاظتی اقدامات کرنا پڑے اور طلبہ کو عارضی طور پر کلاس رومز تک محدود رکھا گیا۔

غیر ملکی میڈیا کے مطابق جمعرات کے روز ریچھ کو ہائی لینڈ اسٹریٹ کے علاقے میں باغیچوں کی دیواریں پھلانگتے ہوئے دیکھا گیا، جس کے بعد قریبی ہائی اسکول میں فوری حفاظتی انتظامات نافذ کر دیے گئے۔

اسکول انتظامیہ نے طلبہ کو احتیاطی تدابیر کے تحت کلاس رومز میں ہی رہنے کی ہدایت کی جبکہ متعلقہ ادارے ریچھ کی نقل و حرکت پر نظر رکھتے رہے۔

بعد ازاں یہی ریچھ تقریباً دو میل دور واقع کلارک یونیورسٹی کے احاطے میں بھی دیکھا گیا، جس سے طلبہ اور عملے میں تشویش کی لہر دوڑ گئی۔

پولیس حکام کے مطابق ریچھ نے کسی شخص کو نقصان نہیں پہنچایا اور کچھ دیر بعد خود ہی قریبی جنگلاتی علاقے کی جانب واپس چلا گیا۔

ماحولیاتی پولیس اور جنگلی حیات کے ماہرین مسلسل اس کی نگرانی کر رہے ہیں تاکہ کسی ممکنہ خطرے سے بچا جا سکے۔