آئی ایم ایف کا گاڑیوں اور سولر پینلز پر سیلز ٹیکس چھوٹ برقرار رکھنے سے انکار

اسلام آباد: آئندہ مالی سال 2026-27 کے وفاقی بجٹ سے قبل عوام اور آٹو انڈسٹری کے لیے بری خبر سامنے آئی ہے۔ بین الاقوامی مالیاتی فنڈ (IMF) نے بجٹ میں ہائبرڈ اور الیکٹرک گاڑیوں (EVs) پر سیلز ٹیکس کی چھوٹ اور رعایتی نرخ برقرار رکھنے کی حکومتی درخواست کو صاف مراجع کر کے مسترد کر دیا ہے۔

وزارتِ صنعت و پیداوار کے ذرائع کے مطابق، آئی ایم ایف کے سخت مطالبے پر آئندہ وفاقی بجٹ میں ہائبرڈ اور الیکٹرک گاڑیوں پر مکمل 18 فیصد سیلز ٹیکس عائد کرنے کی تیاریاں شروع کر دی گئی ہیں۔ اس اقدام کے نتیجے میں نئے مالی سال کے بجٹ کے بعد ملک میں ماحول دوست اور جدید گاڑیوں کی قیمتوں میں زبردست اضافہ دیکھنے میں آئے گا، جس سے مڈل کلاس اور آٹو سیکٹر شدید متاثر ہوں گے۔

ذرائع کا کہنا ہے کہ آئی ایم ایف کے دباؤ کے باعث آئندہ بجٹ میں سیلز ٹیکس کی چھوٹ اور رعایتیں مزید محدود یا مکمل ختم کی جا رہی ہیں، جن کی ممکنہ تفصیل درج ذیل ہے:

گاڑیوں کے ساتھ ساتھ بجلی کے بحران سے تنگ عوام کے لیے متبادل توانائی کا سستا ذریعہ یعنی سولر پینلز بھی اب مہنگے ہونے جا رہے ہیں۔ آئی ایم ایف کی شرائط کے تحت آئندہ مالی سال کے بجٹ میں سولر پینلز پر بھی سیلز ٹیکس کو 10 فیصد سے بڑھا کر 18 فیصد کیے جانے کا قوی امکان ہے، جس سے سولر سسٹم لگوانے کی لاگت میں ہزاروں روپے کا اضافہ ہو جائے گا۔

گاڑیوں کی درآمدات میں کمی کا رجحان

ٹیکس چھوٹ ختم ہونے کا اثر براہِ راست گاڑیوں کی فروخت اور درآمد پر پڑے گا۔

اعداد و شمار کے مطابق، گزشتہ مالی سال کے دوران ملک میں مجموعی طور پر 45 ہزار گاڑیاں درآمد کی گئی تھیں، جبکہ ٹیکسز اور معاشی سست روی کے باعث رواں مالی سال یہ تعداد محض 40 ہزار تک محدود رہنے کا تخمینہ لگایا گیا ہے۔

دستیاب دستاویزات کے مطابق، رواں مالی سال کے پہلے 10 مہینوں (جولائی تا اپریل) کے دوران اب تک تقریباً 38 ہزار گاڑیاں درآمد کی جا چکی ہیں، تاہم نئے ٹیکسز کے نفاذ کے بعد آنے والے دنوں میں اس امپورٹ گراف میں مزید بڑی گراوٹ کی پیش گوئی کی جا رہی ہے۔