مسلم دنیا کی پہلی خاتون وزیراعظم بینظیر بھٹو کی آج 73 ویں سالگرہ

مسلم دنیا کی پہلی خاتون وزیراعظم اور دخترِ مشرق محترمہ بینظیر بھٹو شہید کی 73 ویں سالگرہ آج عقیدت و احترام سے منائی جا رہی ہے۔ اپنی بے پناہ قائدانہ صلاحیتوں، مخالفین سے گفت و شنید کے ہنر اور امورِ مملکت چلانے میں بھٹو کی بیٹی واقعی بے نظیر تھی، جو اپنی آخری سانسوں تک جرات، ہمت، قابلیت اور ذہانت کی علامت بن کر رہیں۔ ان کا شمار ایشیا کی ان ممتاز ترین خواتین سیاستدانوں میں ہوتا ہے جنہوں نے بدترین اور کٹھن سیاسی حالات کا انتہائی حوصلے کے ساتھ مقابلہ کیا۔

21 جون 1953 کو کراچی میں پیدا ہونے والی سابق صدر و وزیراعظم ذوالفقار علی بھٹو کی صاحبزادی بینظیر بھٹو کو دو مرتبہ پاکستان کی وزیراعظم منتخب ہونے کا اعزاز حاصل ہوا، اور وہ جنوبی ایشیا سمیت پورے عالمِ اسلام کی پہلی خاتون وزیراعظم بنیں۔ برطانیہ کی مایہ ناز آکسفورڈ یونیورسٹی سے اعلیٰ تعلیم حاصل کر کے وطن واپسی پر وہ اپنے والد کے ساتھ غیر ملکی دوروں پر امورِ خارجہ کو سمجھنے لگی تھیں، لیکن 1977 میں ذوالفقار علی بھٹو کی حکومت کا تختہ الٹائے جانے کے بعد انہیں سخت ترین عدالتی و سیاسی معرکوں کا سامنا کرنا پڑا۔

محترمہ بینظیر بھٹو 1982 میں پاکستان پیپلز پارٹی (PPP) کی چیئرپرسن منتخب ہوئیں اور جنرل ضیاء الحق کے دورِ حکومت میں انہیں طویل جلاوطنی بھی اختیار کرنا پڑی۔ وطن واپسی پر انہوں نے سویلین بالادستی کے لیے جدوجہد کی اور 1988 کے عام انتخابات میں کامیابی حاصل کر کے پہلی بار ملک کی وزیراعظم بنیں، جس کے بعد عوام نے انہیں 1993 میں دوبارہ اقتدار کے ایوانوں تک پہنچایا۔ ایک طویل جلاوطنی کے بعد وہ 18 اکتوبر 2007 کو جنرل پرویز مشرف کے دورِ حکومت میں پاکستان واپس آئیں، جہاں ملک بھر میں ان کا تاریخی استقبال کیا گیا، مگر بدقسمتی سے 27 دسمبر 2007 کو راولپنڈی کے لیاقت باغ میں ایک عظیم الشان انتخابی جلسے کے بعد نامعلوم دہشت گردوں نے فائرنگ اور بم دھماکے کے ذریعے انہیں شہید کر دیا۔