کراچی میں موسم جزوی ابرآلود، تیز ہوائیں چلنے اور بوندا باندی کا امکان

صوبائی دارالحکومت کراچی میں آج موسم گرم و مرطوب رہنے، مطلع جزوی طور پر ابر آلود رہنے اور تیز سمندری ہوائیں چلنے کا امکان ہے۔ محکمۂ موسمیات کی جانب سے جاری کردہ الرٹ کے مطابق، شہرِ قائد میں آئندہ 24 گھنٹوں کے دوران رات اور صبح کے اوقات میں بوندا باندی متوقع ہے، جبکہ سمندری ہوائیں 25 سے 55 کلومیٹر فی گھنٹہ کی رفتار سے چل سکتی ہیں۔ شہر میں آج کم سے کم درجہ حرارت 28.5 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 33 سے 35 ڈگری سینٹی گریڈ تک جانے کی توقع ہے۔ چیف میٹرولوجسٹ کے مطابق، آج صبح ہوا میں نمی کا تناسب 82 فیصد ریکارڈ کیا گیا جو دن بھر 60 سے 85 فیصد کے درمیان برقرار رہ سکتا ہے۔ حکام نے شہریوں کو متنبہ کیا ہے کہ ہوا میں نمی کا تناسب زیادہ ہونے کے باعث حبس کی شدت میں اضافہ ہوگا، جس کی وجہ سے درجہ حرارت اصل سے 5 سے 8 ڈگری سینٹی گریڈ تک زیادہ محسوس ہو رہا ہے۔