شیخ حسینہ کی وطن واپسی کا خیرمقدم، سزائے موت پر نظر ثانی ہو سکتی ہے: بنگلہ دیش

بنگلہ دیشی حکومت نے سابق وزیرِ اعظم شیخ حسینہ واجد کے رواں سال کے اختتام تک رضاکارانہ طور پر وطن واپس آنے کے فیصلے کا خیرمقدم کرتے ہوئے واضح کیا ہے کہ انہیں بنگلہ دیش واپسی پر قانون کا سامنا کرنا ہوگا۔ بنگلہ دیشی وزیرِ اعظم کے مشیر زاہد الرحمٰن نے میڈیا بریفنگ میں کہا کہ حکومت ان کی واپسی کا خیرمقدم کرتی ہے اور انہیں دفاع کے لیے دنیا کے بہترین وکلاء لانے کی مکمل آزادی ہوگی۔ انہوں نے یقین دہانی کرائی کہ انٹرنیشنل کرائمز ٹربیونل میں ان کے خلاف مقدمے کی سماعت انتہائی شفاف ہوگی، اور یہ بھی ممکن ہے کہ عدالت ان کی سزائے موت کے فیصلے پر نظرِ ثانی کرے یا انہیں بری کر دے۔ یاد رہے کہ اگست 2024ء میں پرتشدد طلبہ احتجاج کے بعد بھارت فرار ہونے والی 78 سالہ شیخ حسینہ واجد کو گزشتہ سال نومبر میں عدم موجودگی میں سزائے موت سنائی گئی تھی، جسے وہ سیاسی انتقام قرار دے کر مسترد کر چکی ہیں۔ دوسری جانب، بھارتی وزارتِ خارجہ کے ترجمان رندھیر جیسوال نے اس معاملے پر محتاط ردِعمل دیتے ہوئے کہا ہے کہ حوالگی سے متعلق کسی بھی درخواست سے قانون کے مطابق نمٹا جائے گا۔