مودی کی نااہلی سے بھارت خواتین کیلئے سب سےغیر محفوظ ملک بن گیا

وزیر اعظم نریندر مودی کے غیر مؤثر قانونی نظام اور عدالتی بے حسی کے باعث بھارت میں خواتین کے خلاف جرائم میں ہوشربا اضافہ دیکھنے میں آ رہا ہے، جس پر عالمی برادری اور بین الاقوامی ذرائع ابلاغ نے سخت تشویش کا اظہار کیا ہے۔ عالمی خبر رساں جریدے ‘رائٹرز’ کی رپورٹ کے مطابق، سال 2010 کے بعد سے اب تک بھارت میں خواتین کے خلاف سنگین جرائم کی شرح دو گنا سے بھی زیادہ ہو چکی ہے۔ نیشنل کرائم ریکارڈز بیورو (NCRB) کے جاری کردہ ہولناک اعداد و شمار بتاتے ہیں کہ بھارت میں روزانہ اوسطاً 80 سے زائد خواتین کے خلاف جرائم کے واقعات رپورٹ ہوتے ہیں، جبکہ صرف سال 2024 کے دوران ملک بھر میں خواتین سے زیادتی کے 29 ہزار 536 مقدمات درج کیے گئے۔ رپورٹ میں واضح کیا گیا ہے کہ بھارتی معاشرے میں رائج روایتی ذات پات کا نظام، پولیس کی غفلت اور عدلیہ کی بے حسی نے خواتین کی زندگیوں کو شدید خطرات سے دوچار کر دیا ہے۔ اس حوالے سے بھارتی سماجی کارکن رنجنا کماری کا کہنا ہے کہ جرم کے بعد انصاف میں غیر معمولی تاخیر اور مجرموں کے سزا سے بچ نکلنے کے باعث اب قانون کا خوف بالکل ختم ہو چکا ہے۔ نامور بھارتی وکیل کرونا نونڈی نے بھی مودی حکومت پر کڑی تنقید کرتے ہوئے کہا ہے کہ حکمرانوں نے کبھی بھی اس مسئلے کی اصل جڑ یعنی خواتین کے خلاف پائی جانے والی نفرت اور سماجی تعصب کو ختم کرنے کے لیے کوئی سنجیدہ کوشش نہیں کی۔