پنجاب اسمبلی میں پاک چین سفارتی تعلقات کے 75 سال مکمل ہونے پر تقریب

پنجاب اسمبلی کے ینگ پارلیمنٹیرینز فورم (YPF) نے پاکستان اور چین کے درمیان سفارتی تعلقات کی 75 ویں سالگرہ کے تاریخی موقع پر لاہور میں تعینات چینی قونصل خانے کے نوجوان سفارت کاروں کے اعزاز میں ایک پروقار تقریب کا اہتمام کیا۔ اس خصوصی تقریب کی صدارت اسپیکر پنجاب اسمبلی ملک محمد احمد خان نے کی، جبکہ لاہور میں تعینات چین کے قونصل جنرل سن یان نے تقریب میں بطور مہمانِ خصوصی شرکت کی۔ ینگ پارلیمنٹیرینز فورم کی صدر امینہ حسن شیخ کی قیادت میں منعقد ہونے والی اس تقریب کا بنیادی مقصد دونوں ممالک کے نوجوان ارکانِ اسمبلی اور نوجوان سفارت کاروں کے مابین براہِ راست روابط اور نیٹ ورکنگ کو فروغ دینا تھا تاکہ پارلیمانی سفارت کاری کے عمل کو مزید مضبوط اور فعال بنایا جا سکے۔ تقریب سے خطاب کرتے ہوئے مقررین نے اس بات پر زور دیا کہ پاک چین کی بے مثال اور 75 سالہ دیرینہ دوستی کو آئندہ نسلوں تک کامیابی سے منتقل کرنا اور اسے سٹریٹجک و اقتصادی لحاظ سے مزید مستحکم بنانا دونوں ممالک کی نوجوان قیادت کی اولین اور مشترکہ ذمہ داری ہے۔