سائنس دانوں کا ستارے کی موت کے نایاب منظر کا مشاہدہ

ماہرینِ فلکیات نے تاریخ میں پہلی بار ایک ستارے کی موت اور اس کے تباہ ہونے کے ابتدائی لمحے کا انتہائی تفصیل کے ساتھ مشاہدہ کیا ہے، جس سے یہ سائنسی امکان پیدا ہو گیا ہے کہ بعض عظیم الجثہ ستارے پہلے سے معلوم طریقوں سے مختلف اور ایک بالکل نئے انداز میں اپنا انجام پاتے ہیں۔

رپورٹس کے مطابق گزشتہ سال آئن اسٹائن پروب (Einstein Probe) نامی خلائی دوربین نے زمین سے تقریباً 50 کروڑ نوری سال کے فاصلے پر واقع ایک دور دراز کہکشاں سے آنے والی ایک مختصر مگر انتہائی طاقتور ایکس رے (X-Ray) شعاع کو ریکارڈ کیا تھا، جسے فلکیاتی دنیا میں EP260321A کا نام دیا گیا۔ اس حیران کن دریافت کے فوری بعد دنیا بھر کے سائنس دانوں اور فلکیاتی مراکز نے اس مخصوص مقام کا تفصیلی مشاہدہ شروع کیا۔

دو مختلف اور آزاد تحقیقی ٹیموں کی جانب سے کی جانے والی تحقیق کے مطابق اس ابتدائی ایکس رے اخراج کو ’شاک بریک آؤٹ‘ (Shock Breakout) قرار دیا گیا ہے۔ یہ نایاب اور طاقتور مظہر اس وقت وجود میں آتا ہے جب کسی ستارے میں سپرنووا (Supernova) دھماکے کی صدمے کی تیز رفتار لہر اس کی سطح کو پھاڑ کر باہر نکلتی ہے اور دھماکے سے پیدا ہونے والی پہلی روشنی کو خلا میں خارج کرتی ہے۔

سائنس دانوں کے مطابق اگرچہ ‘شاک بریک آؤٹ’ کا عمل ہر سپرنووا دھماکے کے دوران پیش آنے کا قوی امکان ہوتا ہے، تاہم یہ محض چند سیکنڈز تک ہی برقرار رہتا ہے، جس کی وجہ سے اس کا براہِ راست مشاہدہ اور ڈیٹا ریکارڈ کرنا انتہائی دشوار ہوتا ہے۔ اس سے قبل فلکیاتی تاریخ میں صرف 01 بار ہی اس نایاب فلکیاتی مظہر کی کامیابی سے تصدیق کی جا سکی تھی، جس کے بعد یہ موجودہ دریافت خلائی سائنس کے میدان میں ایک تاریخی اور اہم پیش رفت سمجھی جا رہی ہے۔