پنجاب اسمبلی کی قائمہ کمیٹی نے کرسچن میرج بل 2026 کی منظوری دے دی

پنجاب اسمبلی کی قائمہ کمیٹی برائے انسانی حقوق و اقلیتی امور کے اجلاس میں ’کرسچن میرج بل 2026‘ کو کثرتِ رائے سے متفقہ طور پر منظور کر لیا گیا ہے۔

قائمہ کمیٹی کا یہ اہم اجلاس راحیلہ خادم حسین کی زیر صدارت منعقد ہوا، جس میں بل کے محرک فیلبوس کرسٹوفر نے مجوزہ قانون کمیٹی کے سامنے پیش کیا۔ اس نئی قانون سازی کے تحت برطانوی دورِ حکومت کے پرانے کرسچن میرج ایکٹ 1872 کو منسوخ کرنے کی تجویز دی گئی ہے، اور مسیحی برادری میں شادی کے لیے لڑکے اور لڑکی دونوں کی کم از کم عمر 18 سال مقرر کرنے کی تجویز رکھی گئی ہے۔ واضح رہے کہ پرانے قانون کے تحت مسیحی شادی کے لیے لڑکے کی کم از کم عمر 16 سال اور لڑکی کی عمر 13 سال مقرر تھی۔

• مذہبی وابستگی: مجوزہ بل کے تحت یہ لازم قرار دیا گیا ہے کہ شادی کے دونوں فریقین کا تعلق مسیحی مذہب سے ہونا چاہیے۔

• لازمی رجسٹریشن: بل میں مسیحی شادیوں کی یونین کونسل اور نادرا (NADRA) میں باضابطہ رجسٹریشن کو بھی لازمی قرار دینے کی تجویز دی گئی ہے۔ فیلبوس کرسٹوفر نے اس بات پر روشنی ڈالی کہ موجودہ اور پرانے قانون کے تحت مسیحی شادیوں کی یونین کونسل اور نادرا میں رجسٹریشن کا کوئی مؤثر قانونی طریقہ کار موجود نہیں تھا، جس سے خاندانوں کو قانونی مسائل کا سامنا کرنا پڑتا تھا۔