خاتونِ اول بی بی آصفہ بھٹو زرداری کا قومی انسدادِ پولیو مہم کے حوالے سے خصوصی پیغام

اسلام آباد: خاتونِ اول بی بی آصفہ بھٹو زرداری نے کہا ہے کہ سال 2026 کی پہلی قومی انسدادِ پولیو ویکسین مہم کا باقاعدہ آغاز ہو چکا ہے جو بچوں کے محفوظ اور صحت مند مستقبل کی جانب ایک اہم قدم ہے۔

اپنے پیغام میں بی بی آصفہ بھٹو زرداری نے کہا کہ انسدادِ پولیو مہم کے دوران ہیلتھ ورکرز گھر گھر جا کر بچوں کو پولیو کے قطرے پلا رہے ہیں تاکہ اس موذی مرض کا مکمل خاتمہ یقینی بنایا جا سکے۔

انہوں نے کہا کہ انسدادِ پولیو مہم ہمارے بچوں کے تحفظ اور پاکستان سے پولیو کے مکمل خاتمے کی جانب ایک فیصلہ کن اقدام ہے۔

خاتونِ اول نے تمام والدین سے اپیل کی کہ جن بچوں کی عمر پانچ سال یا اس سے کم ہے، انہیں ہر بار انسدادِ پولیو ویکسین ضرور پلوائیں کیونکہ پولیو کے قطرے پلوانا ہی اس مرض کے خاتمے کا واحد مؤثر راستہ ہے۔

بی بی آصفہ بھٹو زرداری نے کہا کہ آئیں، مل کر اپنے بچوں کو پولیو سے محفوظ اور صحت مند مستقبل فراہم کریں۔