ارشد ندیم کامن ویلتھ گیمز میں اپنے اعزاز کے دفاع کیلئے تیار

پاکستان کے مایہ ناز اولمپک گولڈ میڈلسٹ ارشد ندیم کامن ویلتھ گیمز میں اپنے اعزاز کا دفاع کرنے اور ایک بار پھر تاریخ دہرانے کے لیے مکمل پرعزم ہیں۔ پنجاب اسٹیڈیم لاہور میں اپنے آخری ٹریننگ سیشن کے بعد گفتگو کرتے ہوئے ارشد ندیم نے بتایا کہ ان کی تیاریاں بہترین ہیں اور وہ خود کو اسی فارم اور پوزیشن میں محسوس کر رہے ہیں جیسی 2022 کے کامن ویلتھ گیمز میں تھی، جہاں انہوں نے ریکارڈ تھرو کے ساتھ گولڈ میڈل جیتا تھا۔ انہوں نے کہا کہ چیمپئن ہونے کا دباؤ ضرور ہے، لیکن ان کا مقابلہ ہمیشہ خود سے رہا ہے اور وہ میدان میں اس پریشر کو کنٹرول کرنے کی صلاحیت رکھتے ہیں۔ ارشد ندیم نے یہ بھی بتایا کہ کامن ویلتھ گیمز سے قبل اپنی فٹنس اور اسٹرینتھ کو پرکھنے کے لیے وہ آج رات سوئٹزرلینڈ روانہ ہو رہے ہیں جہاں وہ ایک بین الاقوامی مقابلے میں حصہ لیں گے۔ انہوں نے مداحوں سے دعاؤں کی اپیل کرتے ہوئے امید ظاہر کی کہ وہ ایک بار پھر ملک کے لیے بڑی کامیابی حاصل کریں گے۔