عامر خان کی عبداللہ شاہ غازی کے مزار پر حاضری، لنگر بھی تقسیم کیا

کراچی: پاکستان کے دورے پر آئے ہوئے پاکستانی نژاد سابق عالمی باکسنگ چیمپئن عامر خان کراچی پہنچ گئے جہاں انہوں نے کلفٹن کے ساحل پر واقع حضرت عبداللہ شاہ غازیؒ کے مزار پر حاضری دی۔

عامر خان نے مزار پر چادر چڑھائی، پھول نچھاور کیے اور فاتحہ خوانی کی۔ اس موقع پر انہوں نے پاکستان کے استحکام، سلامتی اور خوشحالی کے لیے خصوصی دعا بھی کی۔

سابق پروفیشنل باکسر نے مزار کے مختلف حصوں کا دورہ کیا، جہاں انہیں سندھ کی ثقافت کی علامت روایتی اجرک بھی پیش کی گئی۔

واضح رہے کہ عامر خان نے اس سے قبل واہگہ بارڈر کا بھی دورہ کیا تھا، جہاں انہوں نے پاکستان کی بہادر مسلح افواج سے محبت، احترام اور یکجہتی کا اظہار کیا۔ اس موقع پر انہوں نے اتحاد، حب الوطنی اور قوم کی حفاظت میں پاک فوج کے کردار کو زبردست خراجِ تحسین پیش کیا تھا۔