امریکی کوہ پیما نے 101 منزلہ عمارت بغیر حفاظتی آلات سر کرلی

امریکی کوہ پیما الیکس ہونولڈ نے ایک اور حیران کن کارنامہ انجام دیتے ہوئے بغیر کسی رسی، ہارنس یا حفاظتی آلات کے تائیوان کی مشہور فلک بوس عمارت تائپے 101 کو کامیابی سے سر کر لیا۔

تائپے 101 کا نام اس کی 101 منزلوں کی وجہ سے رکھا گیا ہے، یہ عمارت 508 میٹر (1667 فٹ) بلند ہے اور اسٹیل، شیشے اور کنکریٹ سے تعمیر کی گئی ہے، جبکہ اس کا ڈیزائن بانس کی لکڑی سے مشابہ رکھا گیا ہے۔

الیکس ہونولڈ اس سے قبل بھی دنیا بھر میں اپنی جان جوکھوں میں ڈالنے والی مہمات کے باعث شہرت حاصل کر چکے ہیں۔ وہ بغیر کسی حفاظتی سامان کے امریکا کی ریاست کیلیفورنیا کے یوسمائٹ نیشنل پارک میں واقع 915 میٹر بلند گرینائٹ چٹان ایل کیپیٹن کو سر کرنے والے پہلے شخص تھے۔

یہ مہم اصل میں ہفتے کے روز انجام دی جانی تھی تاہم خراب اور نم موسم کے باعث اسے ملتوی کر دیا گیا۔ بعد ازاں یہ مہم تائیوان کے دارالحکومت میں نیٹ فلکس پر براہِ راست نشر کی گئی۔

نیٹ فلکس انتظامیہ کے مطابق کسی بھی ممکنہ ناخوشگوار صورتحال کی صورت میں نشریات میں تاخیر رکھی گئی تھی، جبکہ واقعے کی صورت میں لائیو نشریات بند کرنے کا فیصلہ پہلے سے طے تھا۔