غصیلے نوجوانوں کو صحت کے کن مسائل کا سامنا کرنا پڑ سکتا ہے؟

ایک نئی تحقیق میں انکشاف ہوا ہے کہ غصیلے اور جارحانہ رویہ رکھنے والے نوجوانوں کی حیاتیاتی عمر تیزی سے بڑھ سکتی ہے اور انہیں بعد کی زندگی میں صحت سے متعلق مختلف پیچیدگیوں کا سامنا بھی کرنا پڑ سکتا ہے۔

جرنل ہیلتھ سائیکالوجی میں شائع ہونے والی تحقیق کے مطابق نوجوانوں میں جارحانہ رویہ حیاتیاتی عمر میں تیزی سے اضافے اور 30 برس کی عمر تک زیادہ باڈی ماس انڈیکس (BMI) سے تعلق رکھتا ہے۔

یہ تحقیق یونیورسٹی آف ورجینیا میں کی گئی جس میں امریکا کے جنوب مشرقی علاقوں کے شہری اور مضافاتی علاقوں سے تعلق رکھنے والے 121 مڈل اسکول طلبہ شامل تھے، جن میں 46 لڑکے اور 75 لڑکیاں تھیں۔

محققین نے شرکا کا مشاہدہ 13 برس کی عمر سے جوانی تک کیا۔ اس دوران والدین اور ساتھیوں سے ان کے رویے کے بارے میں معلومات حاصل کی گئیں تاکہ یہ معلوم کیا جا سکے کہ کون سے نوجوان زیادہ جارحانہ مزاج رکھتے ہیں۔

جب شرکا کی عمر 30 برس ہوئی تو سائنس دانوں نے ان کے حیاتیاتی بڑھاپے کا جائزہ لیا۔ اس مقصد کے لیے بلڈ پریشر، جسم میں سوزش، گلوکوز کی سطح، کولیسٹرول اور مدافعتی نظام کی کارکردگی جیسے اہم طبی پیمانوں کو جانچا گیا۔

تحقیق کے نتائج کے مطابق کم عمری میں زیادہ غصہ اور جارحیت رکھنے والے افراد میں نہ صرف حیاتیاتی عمر زیادہ تیزی سے بڑھنے کے آثار دیکھے گئے بلکہ ان میں وزن اور صحت کے دیگر مسائل پیدا ہونے کا خطرہ بھی زیادہ پایا گیا۔