آبنائے ہرمز کی بحالی : پاسدارانِ انقلاب کی جہازوں کے لیے نئی شرائط

ایران نے اسرائیل اور لبنان کے درمیان جنگ بندی کے تناظر میں آبنائے ہرمز کھولنے کا اعلان کر دیا ہے، تاہم پاسدارانِ انقلاب نے اس اہم بحری گزرگاہ سے گزرنے والے جہازوں کے لیے نئی شرائط عائد کر دی ہیں۔

ایرانی وزیر خارجہ عباس عراقچی کی جانب سے آبنائے ہرمز کھولنے کے اعلان کے بعد امریکی صدر نے اس اقدام کو سراہتے ہوئے شکریہ ادا کیا، لیکن اس کے ساتھ ہی پاسدارانِ انقلاب نے اپنے بیان میں سخت قواعد و ضوابط بھی جاری کیے۔

عالمی خبر رساں اداروں کے مطابق پاسدارانِ انقلاب نے اپنے سوشل میڈیا پلیٹ فارمز پر جاری ہدایات میں کہا ہے کہ آبنائے ہرمز سے گزرنے والے ہر بحری جہاز کو پیشگی اجازت لینا ہوگی، بصورت دیگر اسے گزرنے کی اجازت نہیں دی جائے گی۔

بیان میں مزید کہا گیا ہے کہ صرف سویلین تجارتی جہازوں کو مخصوص راستوں کے ذریعے گزرنے کی اجازت ہوگی، جبکہ فوجی جہازوں کے داخلے پر مکمل پابندی برقرار رہے گی۔

پاسدارانِ انقلاب نے خبردار کیا ہے کہ کسی بھی فوجی جہاز کی جانب سے آبنائے ہرمز میں داخلے کی کوشش کو جنگ بندی کی خلاف ورزی تصور کیا جائے گا اور اس پر سخت ردعمل دیا جائے گا۔

ان اقدامات کو لبنان میں جنگ بندی کے بعد امن برقرار رکھنے کے لیے کیے گئے انتظامات کا حصہ قرار دیا جا رہا ہے، جبکہ ایرانی حکومت پہلے ہی واضح کر چکی ہے کہ تمام جہازوں کو مقررہ آبی راستوں پر سفر اور ایرانی فورسز سے اجازت لینا لازم ہوگا۔