صدر اور وزیراعظم کا عالمی یوم ورثہ پر پاکستان کی ثقافتی شناخت کے تحفظ کا عہد

پاکستان بھر میں آج عالمی یومِ ورثہ (World Heritage Day) منایا جا رہا ہے، اس موقع پر صدرِ مملکت آصف علی زرداری اور وزیراعظم شہباز شریف نے اپنے خصوصی پیغامات میں پاکستان کی قدیم تہذیبوں اور ثقافتی ورثے کے تحفظ کو قومی ترجیح قرار دیتے ہوئے ان کی بحالی کے عزم کا اعادہ کیا ہے۔

صدر آصف علی زرداری نے اپنے پیغام میں پاکستان کو قدیم ترین تہذیبوں کا مرکز قرار دیتے ہوئے کہا کہ سنگی دور سے لے کر مہر گڑھ، موہن جو داڑو اور مغلیہ عہد تک ہمارا تاریخی تسلسل ہماری قومی شناخت کی بنیاد ہے۔ انہوں نے خاص طور پر گندھارا تہذیب اور بدھ مت کے فن پاروں کی عالمی اہمیت پر زور دیا اور کہا کہ یہ ورثہ نہ صرف ہماری تاریخ ہے بلکہ سیاحت کے ذریعے معیشت اور روزگار کے فروغ کا بھی اہم ذریعہ ہے۔ انہوں نے نوجوانوں پر زور دیا کہ وہ اپنی ثقافت کے تحفظ میں اپنا کلیدی کردار ادا کریں۔

وزیراعظم شہباز شریف نے عالمی برادری کے ساتھ یکجہتی کا اظہار کرتے ہوئے کہا کہ پاکستان اپنے مشترکہ ثقافتی ورثے کے تحفظ کے لیے مکمل طور پر پرعزم ہے۔ انہوں نے ثقافتی مقامات کی حفاظت کرنے والے ماہرین کو خراجِ تحسین پیش کرتے ہوئے کہا کہ حکومت پاکستان تاریخی مقامات کو یونیسکو کی عالمی فہرستوں میں شامل کرانے کے لیے سرگرم عمل ہے۔ وزیراعظم نے مزید انکشاف کیا کہ حکومت جدید دور کے تقاضوں کے مطابق ڈیجیٹل ثقافتی پلیٹ فارمز پر سرمایہ کاری کر رہی ہے تاکہ ورثے کو دستاویزی شکل دے کر محفوظ بنایا جا سکے اور ثقافتی سفارت کاری کو فروغ دیا جا سکے۔