سونگھنے کی حس میں کمی کس بیماری کی علامت ہو سکتی ہے؟

طبی سائنس کی دنیا میں ایک بڑی پیش رفت سامنے آئی ہے جہاں محققین نے دریافت کیا ہے کہ سونگھنے کی حس میں کمی الزائمر کی بیماری کی سب سے ابتدائی اور اہم ترین علامت ہو سکتی ہے۔ جرمنی کے تحقیقی ادارے DZNE اور میونخ کی LMU یونیورسٹی کے سائنس دانوں کی اس تازہ ترین تحقیق کے مطابق، سونگھنے کی حس میں یہ تبدیلی یادداشت کے واضح مسائل اور بھولنے کی بیماری ظاہر ہونے سے بھی بہت پہلے رونما ہو جاتی ہے۔

تحقیق میں یہ حیران کن انکشاف ہوا ہے کہ اس عمل میں دماغ کا اپنا مدافعتی نظام کلیدی کردار ادا کرتا ہے۔ دماغ کے مدافعتی خلیے، جنہیں ’مائیکروگلیا‘ کہا جاتا ہے، بعض اوقات غلطی سے ان اعصابی ریشوں پر حملہ کر دیتے ہیں جو سونگھنے کے عمل کے لیے ضروری ہوتے ہیں۔ یہ خلیے دماغ کے دو اہم حصوں، ‘اولفیکٹری بلب’ (جو خوشبو کے سگنلز پراسیس کرتا ہے) اور ‘لوکس سیرو لیئس’ (جو برین اسٹیم میں واقع ہے) کے درمیان رابطے منقطع کر دیتے ہیں، جس کے نتیجے میں انسان خوشبو محسوس کرنے کی صلاحیت کھونے لگتا ہے۔

سائنسی جریدے ’نیچر کمیونیکیشنز‘ میں شائع ہونے والی اس رپورٹ میں چوہوں اور انسانوں کے دماغی بافتوں کے تجزیے اور پی ای ٹی (PET) اسکیننگ کے شواہد شامل کیے گئے ہیں۔ ماہرین کا ماننا ہے کہ یہ نتائج الزائمر کی بروقت تشخیص میں انقلابی ثابت ہو سکتے ہیں۔ اگر سونگھنے کے مسائل کو ابتدائی مرحلے پر ہی پہچان لیا جائے، تو ڈاکٹرز بیماری کو بڑھنے سے روکنے کے لیے زیادہ مؤثر اور فوری علاج شروع کر سکیں گے، جو مستقبل میں لاکھوں مریضوں کے لیے نئی امید ثابت ہو سکتا ہے۔