ایران، امریکا اختلافات برقرار، جنگ بندی میں توسیع اور ابتدائی ڈیل کی امید

ایران کے سینئر عہدیدار نے ایک بار پھر اس بات پر زور دیا ہے کہ امریکا کے ساتھ اہم اختلافات بدستور موجود ہیں، خصوصاً جوہری معاملات اور بامعنی مذاکرات کی ضرورت جیسے حساس نکات پر دونوں ممالک کے درمیان فاصلے برقرار ہیں۔

عہدیدار کے مطابق آبنائے ہرمز کی بحالی اور اسے کھولنے کا فیصلہ امریکا اور ایران کے درمیان جنگ بندی کی شرائط پر عملدرآمد سے مشروط رکھا گیا ہے، جس کے لیے دونوں فریقین کو عملی اقدامات کرنا ہوں گے۔

انہوں نے بتایا کہ آنے والے دنوں میں جنگ بندی میں توسیع کے ساتھ ایک ابتدائی معاہدہ بھی ممکن ہے، جو دونوں ممالک کے درمیان براہ راست مذاکرات کے لیے سازگار ماحول فراہم کرے گا۔

ان کے بقول یہ ابتدائی معاہدہ پابندیوں میں نرمی اور جنگی نقصانات کے ازالے کے لیے بات چیت کی راہ ہموار کر سکتا ہے، جس سے خطے میں کشیدگی کم ہونے کی توقع ہے۔

سینئر ایرانی عہدیدار نے مزید کہا کہ اگر ایران کے مطالبات تسلیم کیے جاتے ہیں تو وہ عالمی سطح پر اپنے جوہری پروگرام کی پرامن حیثیت کے حوالے سے یقین دہانی کرانے کے لیے تیار ہے۔