وزیراعظم شہباز شریف سہ ملکی دورہ مکمل کرکے انطالیہ سے پاکستان روانہ

وزیراعظم محمد شہباز شریف اپنا انتہائی اہم اور مصروف سہ ملکی دورہ مکمل کرکے ترکیہ کے شہر انطالیہ سے پاکستان کے لیے روانہ ہو گئے ہیں۔ انطالیہ ایئرپورٹ پر ترکیہ کی وزارت خارجہ کے اعلیٰ حکام اور پاکستانی سفیر ڈاکٹر یوسف جنید نے وزیراعظم اور ان کے وفد کو رخصت کیا۔

یہ تین روزہ دورہ سعودی عرب، قطر اور ترکیہ پر مشتمل تھا، جس کا مقصد برادر ممالک کے ساتھ معاشی تعلقات کی مضبوطی اور خطے میں امن کے قیام کے لیے مشترکہ حکمت عملی وضع کرنا تھا۔ وزیراعظم نے انطالیہ ڈپلومیسی فورم کے موقع پر ترک صدر رجب طیب اردوان سمیت کئی عالمی رہنماؤں سے ملاقاتیں کیں، جہاں پاکستان کے موقف کو بھرپور انداز میں پیش کیا گیا۔

نائب وزیراعظم اور وزیر خارجہ اسحاق ڈار نے اس دورے کو “نہایت نتیجہ خیز” قرار دیتے ہوئے کہا کہ سعودی عرب اور قطر کے ساتھ مختلف شعبوں میں تعاون کے لیے بامقصد مذاکرات ہوئے ہیں۔ انہوں نے انطالیہ ڈپلومیسی فورم کی کامیابی کو سراہتے ہوئے اسے عالمی امن اور استحکام کے لیے ایک اہم پلیٹ فارم قرار دیا۔