ملک گیر انسدادِ پولیو مہم پانچویں روز بھی جاری، چار دنوں میں 4 کروڑ سے زائد بچوں کی ویکسینیشن مکمل

نیشنل ایمرجنسی آپریشنز سینٹر (EOC) کے مطابق سال 2026 کی دوسری قومی انسدادِ پولیو مہم اپنے پانچویں روز میں داخل ہو گئی ہے، جس کے دوران ملک بھر میں پولیو کے خاتمے کے لیے بھرپور کوششیں جاری ہیں۔ اس مہم کی خاص بات یہ ہے کہ یہ پاکستان اور افغانستان میں بیک وقت منعقد کی جا رہی ہے تاکہ سرحد کے دونوں اطراف وائرس کے پھیلاؤ کو روکا جا سکے۔

مہم کے پہلے چار دنوں کے دوران ملک بھر میں مجموعی طور پر 4 کروڑ 28 لاکھ سے زائد بچوں کو ویکسین پلائی جا چکی ہے۔ صوبائی اعداد و شمار کے مطابق پنجاب میں 2 کروڑ 25 لاکھ، سندھ میں 96 لاکھ 93 ہزار، خیبر پختونخوا میں 68 لاکھ 33 ہزار اور بلوچستان میں 24 لاکھ 6 ہزار سے زائد بچوں کی ویکسینیشن مکمل کی گئی ہے۔ اس کے علاوہ اسلام آباد، گلگت بلتستان اور آزاد جموں و کشمیر میں بھی لاکھوں بچوں کو حفاظتی قطرے پلائے گئے ہیں۔

اس مہم میں 4 لاکھ سے زائد پولیو ورکرز گھر گھر جا کر خدمات سرانجام دے رہے ہیں، جبکہ بچوں کی قوتِ مدافعت بڑھانے کے لیے انہیں وٹامن اے کی اضافی خوراک بھی دی جا رہی ہے۔ نیشنل ای او سی کے مطابق یہ مہم 19 اپریل تک بلا تعطل جاری رہے گی تاکہ ملک کے ہر حصے میں پانچ سال سے کم عمر کے تمام بچوں تک رسائی حاصل کی جا سکے۔