پلاسٹک سرجنز کی 30ویں بین الاقوامی کانفرنس، طبی تحقیق اور تعلیم میں اہم پیش رفت

اسلام آباد: پاکستان ایسوسی ایشن آف پلاسٹک سرجنز کے زیرِ اہتمام 30ویں سالانہ بین الاقوامی کانفرنس کا انعقاد کیا گیا، جس میں طب کے شعبے میں تحقیق، تعلیم اور جدید ترین ٹیکنالوجی کے فروغ کو کلیدی اہمیت دی گئی۔ اس سہ روزہ علمی میلے میں 12 بین الاقوامی ماہرین سمیت ملک بھر سے 400 سے زائد مندوبین اور ممتاز تدریسی اداروں کے سرجنز نے شرکت کی۔ کانفرنس کا بنیادی محور سائنسی مباحثے، نیٹ ورکنگ سیشنز اور جراحت کے شعبے میں ہونی والی عالمی تبدیلیاں تھیں۔

کانفرنس کی خاص بات نان انویسو جمالیاتی طریقہ کار (Non-Invasive Aesthetic Procedures) اور جدید طبی آلات پر خصوصی سیشنز تھے، جن میں ماہرین نے لائیو ڈیمانسٹریشنز کے ذریعے شرکاء کو نئی تکنیکوں سے روشناس کرایا۔ ماہرین کا کہنا تھا کہ سپیشل انویسٹمنٹ فیسیلیٹیشن کونسل (SIFC) کی جانب سے صحت کے شعبے میں کی جانے والی اصلاحات کی بدولت پاکستان میں طبی تحقیق کو نئی جہت ملی ہے، جس سے ملک کا ہیلتھ کیئر سیکٹر عالمی سطح پر اپنی پہچان بنا رہا ہے۔

کانفرنس کے اختتام پر شرکاء نے اس بات پر اتفاق کیا کہ اس طرح کے بین الاقوامی پلیٹ فارمز سے نہ صرف مقامی سرجنز کی مہارتوں میں اضافہ ہوتا ہے بلکہ پاکستان میں سیاحتِ طب (Medical Tourism) کو بھی فروغ ملتا ہے۔ ماہرین نے اس عزم کا اعادہ کیا کہ جدید ٹیکنالوجی کو اپنا کر پاکستان پلاسٹک اور ری کنسٹرکٹو سرجری کے شعبے میں خطے کا مرکز بن سکتا ہے۔