کراچی: شہری کو2 سال قبل چوری ہونے والی موٹرسائیکل نہ ملی، ای چالان مل گیا

شہرِ قائد میں دو سال قبل چوری ہونے والی موٹر سائیکل کے مالک کو ای چالان موصول ہونے کا انکشاف سامنے آیا ہے، جس پر شہری نے حیرت اور تشویش کا اظہار کیا ہے۔

متاثرہ شہری کے مطابق اس کی موٹر سائیکل 7 دسمبر 2023 کو لیاقت آباد کے علاقے سے چوری ہوئی تھی، جس کی باقاعدہ ایف آئی آر بھی متعلقہ تھانے میں درج کروائی گئی، تاہم طویل عرصہ گزرنے کے باوجود موٹر سائیکل برآمد نہ ہو سکی۔

شہری کا کہنا ہے کہ موٹر سائیکل تو تاحال نہیں ملی، البتہ 28 دسمبر 2025 کو اچانک ای چالان موصول ہوا، جو نیشنل اسٹیڈیم فلائی اوور کے قریب ہیلمٹ کی خلاف ورزی پر کیا گیا تھا۔

متاثرہ شہری نے پولیس حکام سے مطالبہ کیا ہے کہ چوری شدہ موٹر سائیکل کی برآمدگی کے لیے مؤثر اقدامات کیے جائیں اور ای چالان کے معاملے کی بھی تحقیقات کی جائیں تاکہ ذمہ داروں کا تعین ہو سکے۔